Home

Il Saluto di mons. Giovanni Cadeddu
per il suo 58° anniversario
della prima messa

 
    Sorris e fradis carissimus,
     Osi pregu, de m'accumpangiai cun is pregadorias bostas de torrai grazias a Deus, po su preziossimu donu chi Issu m'hat boffiu cunçediri; de mi boliri in sa santa Cresia sua, cali ministru diciosu, de su Sacerdoziu, po aggiudai is animas, a ddu conosciri, amai e serbiri, cun zelu e cun amori.
     89 annus di edadi e 58 de Sacerdoziu, no esti cosa de pagu! De notai, chi hapu perdiu 5 annus fendi su militari in tempus de gherra.
     Depu nai, chi seu nasciu in "su bixinau de is predis": Bi' e Mara, Segossini, Bi' e Cubedda, parti de Bia Roma: Sunti nascius: Predi Asuni, Predi Ligas, Canonigu Puxeddu e su Cardinali Amat. A pagu trettu seu nasciu deu, Monsignori Orrù e Predi Giuseppi Perra. In sa Panghixedda, sunti nascius: Predi Giuseppi Coccu, su Para Serra, domenicanu, Canonigu Pinna e su Canonigu Manis. Si ddi naraus: “Bixinau de is predis”, esti cun bona rexoni.
     Candu tenemu pagu prus de 5 annus, cun babbu miu, andendu in Bi' e Mara, a Perd'e Pramas, a segai faixedda frisca, si sighit unu sacerdotu, benendi de sa stazioni de Settimu, andendu a predicai a sa Parrocchia de Mara, mi ponit una manu in conca e mi narat: “Custu pipiu, candu hat’essiri mannu, hat diventai predi”! E deu, dogna borta chi mi domandanta: “A ita fais candu has'esseri mannu”? Respundia sempiri: “A predi”! E mamma, mi narada: “Misiat su predi de tui! Chi no fais a bonu e studias, tui imparas a fai su bagamundu e sa mandronia"! Ma una dì, seu andau aundi fiat su parruccu Monsignori Paderi e ddi nau: Dott. Paderi, emu a boliri intrai in Seminariu! E su Parrucu, babbu amorosu, mi respundiri: Si tenis gana de studiai, de cras'e totu incumenzaus a ti preparai po s’esami de ammissioni. Issu m'hat fattu una bella preparazioni e mi hat presentau a su Rettori de su Seminariu Diocesanu, chi fiat su sacerdotu chi m’hiat previdiu chi hia diventai predi e si narada, Monsignori Giuseppi Orrù, su fundadori de sa Congregazioni de is mongias de sa Sacra Famiglia.
     Pagus annus a pustis, incumenzàda sa gherra e seu depiu andai a fai su militari de leva. Pustis 5 annus, seu torrau a is istudius.
     Depu nai, chi hapu poziu manteniri sa Vocazioni, ddu depu a sa pregadoria, a sa cunfessioni e a sa Santa Comunioni chi hapu poziu frequentai cun s'aggiudu de bonus Cappellanus chi hapu tentu, tra is calis: Mons. Paulu Carta.
     Ordinau Sacerdotu impari cun Mons. Antoninu Orrù, S'Arciobispu Mons. Botto, luegu m'hiat mandau a Pula, pustis a Biddesorris e insaras a Ortacesus. De innì, po motivu de saludi, seu torrau a Sinnia, diletta Patria nosta.
     A Sinnia in ci seu giai 8 lustrus.
     In custu tempus, is parruccus cun is calis hapu circau de donai una manu de aggiudu: Dott. Pisanu, Don Fais e Don Abis carrissimu, chi, cun fraternu amori, m'hat sempiri demostrau carignu sacerdotali, preziosu aggiudu, cunfortu e incoraggiamentu.
     Cumenti bieis, su Signori, m'hat boffiu lassai ancora, cun sa caridadi de carissimus amigus, beniri a celebrai sa santa Missa dogna dì, e custa esti una grazia manna!
    In s'animu miu, intendu unu grandu gosu, pensendi chi Sinnia, esti donendi a sa Cresia de Gesus, ancora tantis sacerdotus e bellas vocazionis. Depeus reconosciri chi custu esti gloria e vantu po sa graziosa çittadina nosta.
     Tra pagu tempus heus a teniri s’allegria de assistiri a s’Ordinazioni sacerdotali de Carlu Frau e aterus ancora chi prestu aspettaus cun grandu amori e gosu.
     Siaus reconoscentis a su Signori e pregheus cun fidi, po chi tengaus sa diciosa sorti de biri ancora medas Santus Ministrus de Deus, Sinniesus.
     Unu bivu rengraziamentu a totus is presentis: Sacerdotus, Autoridadis e a su bellu coru de “Su Cuncordiu”, chi hat accumpangiau custa missa solenni po arregordai s’anniversariu de sa primu missa mia.

     Coru Sacerdotali de Gesus,
     mandasì Santus Sacerdotus.
                                                                                           Giuanni Cadeddu



Indietro


Torna all'inizio