Ave Stella Luminosa,
            de Sardigna lux’ e ghia,
            de su mari ses benia
            cali Mamma Piedosa.

  1.De cent’annus acclamàda,
     nobilissima Matrona
     a su Sardu gósu dona.
     Maria Immaculada,
     de is sardus alabada,
     Reina Vittoriosa.
            De su mari ses benia
            cali Mamma Piedosa.

  2.De Cristus in Roma Santu,
     Piu Deximu in persona,
     fatta Massima Patrona
     de Sardigna tótu cantu,
     po nosu gloria e vantu
     protettora valorosa.
            De su mari ses benia
            cali Mamma Piedosa.

  3.Oh Sardigna fortunada,
     po tali Mamma Potenti,
     a tótu sa Sarda genti
     tenidda sempir’istimada,
     de su mali liberada
     portadd’ a sorti diciosa.
            De su mari ses benia
            cali Mamma Piedosa.

  4.In sa Cresia Mercedaria,
     grandu sogliu t’hant’ offértu
     dogna coru bandat cértu
     a Tui Mamma de Bonaria,
     po sa grazia necessaria
     de una vida virtuosa.
            De su mari ses benia
            cali Mamma Piedosa.

  5. Béni Romanu Onìa,
     béni Babbu de amori,
     de Perdu su Successori.
     Devotissimu de Maria,
     porta nodas de allegria,
     porta paxi preziosa.
            De su mari ses benia
            cali Mamma piedosa.

  6. Po Tui Babbu Diciósu,
     nos Ti cantaus “Osanna”.
     Su populu cun festa manna
     hoi T’acclamat Fervorósu.
     Cun amori Santu e Gósu,
     pregat Maria Graziosa.
            De su mari ses benia
            cali Mamma piedosa.

  7. Custa bella recurrenzia
     nosì plenit de allegria,
     po Tui Santa Maria
     chi Ses Mamma de clemenzia,
     cun sa Materna potenzia
     nosì miras lastimosa.
            De su mari ses benia
            cali Mamma piedosa.

  8. O Patrona de Sardigna,
     a su populu stimau
     de grazias ddas consolau
     cun vera stima carigna.
     Sempri amabili e benigna
     ddu proteggis premurosa.
            De su mari ses benia
            cali Mamma piedosa.

  9. Su populu Sardu T’amat,
     o Celesti Mamma Divina.
     Ti onorat s’Argentina,
     cun fidi forti T’acclamat,
     e de Tui grazias bramat,
     chi dd’aggiudas amurosa.
            De su mari ses benia
            cali Mamma piedosa.

  10. O Amabili Maria,
     Signora de bellu amori,
     a Gesusu Redentori
     portasì dulci e pia,
     Tui de Deus favoria
     nos presentis gloriosa.
               De su mari ses benia
               cali Mamma piedosa.

               Ave Stella Luminosa,
               de Sardigna luxi e ghia,
               de su mari ses benia
               cali Mamma Piedosa.